Eftir örfáa mánuði í Sádí Arabíu hefur Jordan Henderson fengið nóg og hefur rift samningi sínum við Al-Ettifaq. Búist er við að fleiri leikmenn reyni að komast burt á næstunni.

Fjöldi leikmanna fór frá Evrópu til Sádí Arabíu síðasta sumar en nú virðast margir af þeim vilja fara burt frá landinu.

Ensk blöð segja margar ástæður vera fyrir því. Óbærilegur hiti er sögð ein ástæða þess að leikmenn frá Evrópu eiga í vandræðum með að venjast lífinu í Sádí Arabíu, æfingar eru alltaf á kvöldin enda er hitinn á daginn alltaf í kringum 40 gráðurnar.

Ömurlegt mæting er nefnd sem önnur ástæða en sem dæmi mættu 144 áhorfendur á leik Al-Riyadh og Al-Khalee. Jordan Henderson og félagar í Al-Ettifaq spiluðu leik þar sem 600 áhorfendur mættu.

Flestar stjörnurnar sem mættar eru í deildina eru vanar því að spila fyrir um og yfir 50 þúsund áhorfendur í hverri umferð.

Lífsstíllinn utan vallar er svo sagður erfiður fyrir marga, lítið er í boði af þeim hlutum sem þessir leikmenn venjast frá Evrópu.

Einnig er sú ástæða nefnd að leikmenn eiga á hættu að missa sæti sitt í landsliðum sínum og er það ein ástæða þess að Henderson flýr Sádí.