Breiðablik hefur selt Anton Loga Lúðvíksson til Haugesund í Noregi. Félögin staðfesta þetta.

Óskar Hrafn Þorvaldsson er þjálfari Haugesund en hann tók við í haust eftir góð ár hjá Breiðabliki. Anton var í lykilhlutverki hjá Breiðablik síðasta sumar og lék afar vel á miðsvæði liðsins undir stjórn Óskars.

Anton er annar Íslendingurinn sem Óskar fær til Haugesund en áður hafði hann keypt Hlyn Frey Karlsson frá Val.

Miðjumaðurinn, sem er tvítugur, fór árið 2020 til SPAL á Ítalíu í stutta stund en fær nú annað tækifæri í atvinnumennsku.

Anton er í íslenska landsliðshópnum sem er á leið til Bandaríkjanna í verkefni þar sem liðið leikur tvo æfingaleiki.

Tilkynning Breiðabliks
Anton Logi Lúðvíksson seldur til FK Haugesund

Þessi ungi og efnilegi leikmaður heldur nú til Noregs og mun þar spila fyrir norska úrvalsdeildarliðið FK Haugesund sem Óskar Hrafn Þorvaldsson þjálfar.

Anton Logi er uppalinn Bliki og hefur spilað 70 leiki með meistaraflokki fyrir Breiðablik og skorað í þeim 6 mörk en þar af eru 17 Evrópuleikir. Anton Logi fór áður á láni til SPAL á Ítalíu en tekur nú stórt skref með þessum samning við FK Haugesund. Anton Logi á einnig landsleiki með yngri landsliðum Íslands og var á dögunum valinn í A landslið karla.

Um leið og við þökkum Antoni Loga fyrir allt sem hann hefur gert fyrir Breiðablik þá óskum við honum góðs gengis í nýjum og spennandi verkefnum.