Jamie Carragher fyrrum varnarmaður Liverpool er vægast sagt óhress með félagið sitt og hvernig það stendur sig á leikmannamarkaðnum.
Carragher ræddi um málið á Sky Sports eftir að ljóst var að Romeo Lavia hefði kosið að fara til Chelsea líkt og Moises Caicedo sem hafa báðir hafnað Liverpool á undanförnum dögum.
„Þetta hefur verið algjör hryllingur, þetta er grín. Liverpool hefur vitað af því að miðsvæðið þyrfti styrkingu í tólf mánuði,“ segir Carragher.
Jorg Schmadtke var ráðinn yfirmaður knattspyrnumála hjá Liverpool í vetur og fær á baukinn fyrir kaup sumarsins.
„Nýr yfirmaður knattspyrnumála hefur náð að virkja tvær klásúlur í sumar, ekki neitt meira en það,“ segir Carragher.
Tveir lykilmenn hafa hætt störfum hjá Liverpool á undanförnum mánuðum. „Af hverju fóru Michael Edwards og Julian Ward? Það er spurning sem þarf svar við,“ segir Carragher.