Emil Hallfreðsson, fyrrum landsliðsmaður í knattspyrnu er sagður vilja snúa heim og enda ferilinn sinn hjá FH. Dr. Football fjallaði um málið.
Emil á magnaðan 18 ára feril að baki í atvinnumennsku en hann fór frá FH til Tottenham árið 2005. FH er hans uppeldisfélag.
Hann hefur síðan þá lengst af spilað á Ítalíu og lengi vel lék hann í Seriu A.
„Hann fer í FH eða hann sleppir þessu. Hann er ekki að fara að kreista eitthvað úr Val eða eitthvað, hann er klár í að taka eitt tímabil,“ sagði Hjörvar Hafliðason í dag.
Emil fagnar 39 ára afmæli sínu í sumar en hann lék 73 landsleiki á ferli sínum með Íslandi og var með liðinu á EM 2016 og HM 2018.
„Hann er laus í næsta glugga, ég veit ekki hvar þetta stendur gagnvart FH. Hann er klár og FH eru klárir en það er ekkert almennilegt að gerast þarna.“
FH situr í fimmta sæti Bestu deildarinnar en Heimir Guðjónsson var leikmaður FH þegar Emil lék síðast með liðinu.
