Arnar Þór Viðarsson, þjálfari íslenska karlalandsliðsins, segir að Albert Guðmundsson hafi ekki verið til í að koma inn í landsliðshópinn eftir að honum var tjáð að hann yrði ekki í byrjunarliði í komandi landsleik gegn Bosníu og Hersegóvínu.

Þetta kom fram á fréttamannafundi landsliðsins í gær en Albert er ekki í hópnum en undanfarið hefur Arnar ekki valið hann út af hugarfari leikmannsins.

Segja má að þetta mál hafi tekið yfir alla umræðu í kringum landsliðið síðustu daga en málið var rætt í fréttum vikunnar á Bylgjunni í morgun.

„Mér finnst í gegnum árin, þá kemur alltaf upp umræða um svona. Einhver einn leikmaður sem fer í þessa umræðu,“ sagði Rúnar Róbertsson sem var gestur hjá Heimi Karlssyni og Gulla Byggir.

Fjölskylda Alberts segir að hann hafi kosið að vera með fjölskyldu sinni og nýfæddu barni frekar en að fara í verkefnið.

„Það kom meira frá hans hlið og Arnar svaraði því og sagði að Albert vildi ekki vera í hópnum nema í byrjunarliði.

Heimir Karlsson sem lék sem atvinnumaður í knattspyrnu og lék þrjá A-landsleiki á ferli sínum hafði þetta að segja um málið. „Ég man ekki eftir að landsliðsmaður hefi gert þessa kröfu, maður setur þann fyrirvara á að þetta sér rétt,“ sagði Heimir.

Heimir hélt svo áfram og sagði. „Ef það er rétt að hann hafi gert kröfu um þetta, þá er það sérstakt.“

Íslenska karlalandsliðið mætir Bosníu og Liechtenstein síðar í mánuðinum í undankeppni EM 2024