Þjálfari íslenska karlalandsliðsins í knattspyrnu, Arnar Þór Viðarsson, tók upp tólið á dögunum og hringdi í Albert Guðmundsson. Kannaði hann hug leikmannsins gagnvart mögulegri endurkomu í íslenska landsliðið fyrir leiki gegn Bosníu og Hersegóvínu og Liechtenstein síðar í mánuðinum.
Það er Fréttablaðið sem skýrir frá þessu í dag.
Síðasta haust hætti Arnar að velja Albert í hóp sinn vegna ósættis þeirra á milli. Þjálfarinn sagði þennan leikmann Genoa á Ítalíu hafa sýnt slæmt hugarfar í verkefnum á undan.
Fréttablaðið segir að Arnar hafi nú átt frumvæðið af því að reyna að ná sáttum þeirra á milli og kannað hugsanlega endurkomu Alberts í landsliðið.
Albert hefur átt frábært tímabil með Genoa í ítölsku B-deildinni. Hann hefur skorað níu mörk og lagt upp fimm í 29 leikjum.
Ísland mætir Bosníu þann 23. mars en Liechtenstein þremur dögum síðar í undankeppni Evrópumótsins 2024.
Arnar mun tilkynna hóp sinn á morgun og þá kemur í ljós hvort Albert snúi aftur eður ei.
