Stjórn knattspyrnudeildar Víkings hefur hafnað tilboði sænska úrvalsdeildarliðsins Norrköping í Arnar Gunnlaugsson þjálfara, karlaliðsins.
Þetta kemur fram á heimasíðu félagsins en einnig kemur fram að það hafi slitið viðræðum við Norrköping.
„Tilboð Norrköping var ekki nálægt því sem við teljum virði Arnars Gunnlaugssonar vera. Því ákvað félagið að afþakka frekari samningaviðræður og setja allan fókus á undirbúning fyrir næsta tímabil.
Arnar er afar fær þjálfari og mikilvægur okkur Víkingum og er ég afar spenntur fyrir áframhaldandi samstarfi með Arnari,“ segir Kári Árnason, yfirmaður knattspyrnumála hjá Víkingi, við heimasíðu félagsins.
Þetta eru ansi stórar fréttir fyrir Víkinga og Bestu deildina í heild en margir héldu að Arnar væri á förum.
