Íþróttavikan kemur út alla föstudaga en þeir Helgi Fannar Sigurðsson og Hrafnkell Freyr Ágústsson sjá um þáttinn. Gestur þessa vikuna var sparkspekingurinn og fótboltaþjálfarinn Mikael Nikulásson.
Mikael er þjálfari KFA í 2.deild karla og ræddi hann í þættinum meðal annars þá erfiðleika að fá íslenska leikmenn til að koma úr bænum og spila úti á landi.
„Það er eiginlega ómögulegt,“ sagði hann. „Það er eiginlega ómögulegt að fá leikmenn austur, nema þeir séu að austan en þá er það samt ekki auðvelt. Það er bara mjög slæmt og verst fyrir þessa ungu stráka.
Þetta er orðið þannig að það er meira að segja erfitt fyrir Selfoss og Njarðvík að fá leikmenn. Ég hef kallað eftir því að menn rífi sig upp af rassgatinu. Hvað ætla þessir strákar sér?“
Hrafnkell segir að hann hefði sjálfur viljað prófa að spila út á landi þegar tækifærið gafst.
„Að búa einn og þurfa jafnvel að henda í einhverja ommelettu, það er bara hellings lærdómur.“
Umræðan í heild er í spilaranum.
