Bridgwater United er lið sem ekki margir hafa heyrt um hér á landi en það spilar í níundu efstu deild enska fótboltans. Félagið er hins vegar búið að reka þjálfara sinn og hvernig það var tilkynnt hefur vakið mikla athygli.
Dave Pearse var leystur undan störfum eftir sjö ár hjá Bridgewater sem leikmaður og þjálfari. Liðið situr í öðru sæti og er í hörkubaráttu um að fara upp um deild en ákveðið var að skipta um stjóra og aðstoðarmaður Pearse tekinn við í bili.
„Eftir sjö ár David sem spilandi þjálfari og síðar þjálfari hefur liðið ekki en komist upp um deild. Úrslitin hingað til hafa verið fín en ekki frábær. Þrjú töp kostuðu félagið 9 stig og 10 þúsund pund í kostnað. Það er ekki ásættanlegt fyrir nýja eigandann okkar, Ian Davis,“ segir í furðulegri yfirlýsingu Bridgewater.
„Ian vill að félagið fari upp og það var erfitt fyrir hann að taka þessa ákvörðun en hann taldi mikilvægt að það þyrfti ferskt blóð til að koma félaginu á þann stað sem við viljum hafa það.
Ian hefur eytt miklum peningum í að hreinsa félagið af skuldum og hefur bætt innviðina hér mikið. Hann vill bara það besta fyrir félagið. Þetta snýst um það en ekki einhverja eina manneskju.“
Yfirlýsingin þykir furðuleg og fór öfugt ofan í fólk.
„Þetta er til skammar,“ skrifaði einn netverji og margir tóku í sama streng.
