Það kom mörgum á óvart um helgina þegar Antoine Griezmann var orðaður við Manchester United um helgina. Þetta var til umræðu í hlaðvarpsþættinum Þungavigtin. Þar gaf sparkspekingurinn geðþekki Kristján Óli Sigurðsson lítið fyrir þessa orðróma.
Kristján var ekki lengi að taka til máls eftir að þáttastjórnandinn Ríkharð Óskar Guðnason hóf að ræða orðrómana um Griezmann og Manchester United.
„Ríkharð, ekki lesa bara einhverja slúðurmiðla,“ sagði Kristján.
„Þetta kæmi ekkert á óvart. United er búið að gera þetta milljón sinnum,“ skaut Ríkharð þá inn í áður en Kristján tók til máls á ný.
„Þetta er þvættingur. Það er verið að búa til fréttir, ekki vera svona vitlausir alla daga.“
Ríkharð færði þá rök fyrir máli sínu.
„Hversu oft hefur United farið þessa leið? Hversu oft? 36 ára Zlatan, Henrik Larsson, Edinson Cavani. Á ég að halda áfram? Odion Ighalo. Þvættingur er þetta,“ sagði hann.
Mikael Nikulásson var með þeim félögum í setti að vanda.
„Það er allt í lagi, ef hann fær eðlileg laun, að taka hann í eitt og hálft ár. Eini möguleikinn til að hann komi er sennilega að bjóða honum einhver stjarnfræðileg laun og það er auðvitað bara þvæla,“ sagði Mikael.
