Það eru áhyggjur af ástandi vallarins sem enska karlalandsliðið spilar á gegn Norður-Makedóníu í kvöld.

Liðin mætast í undankeppni EM 2024 en England hefur þegar tryggt sæti sitt á mótinu.

Nýtt gras var lagt á völlinn fyrir sex vikum og er það talið varasamt.

Miðað við orð Gareth Southate, þjálfara enska liðsins, mun hann hvíla eitthvað í kvöld.

„Við tökum enga sénsa með leikmenn. Ég veit að það er nýbúið að leggja grasið og það er eflaust ekki nógu þétt, en við sjáum til,“ sagði Southgate.

„Þetta er ástæðan fyrir því að þú vilt tryggja sætið þitt á mótinu eins snemma og hægt er. Þú veist aldrei við hverju þú átt að búast á útivelli.“