Kári Árnason, goðsögn íslenska landsliðsins, tjáði sig í settinu hjá Stöð 2 Sport í kvöld eftir leik Íslands við Portúgal.

Bruno Fernandes og Ricardo Horta skoruðu einu mörkin í leik kvöldsins en Ísland tapaði viðureigninni 2-0.

Frammistaðan var þó betri en gegn Slóvakíu á dögunum þar sem strákarnir þurftu að sætta sig við 4-1 tap.

,,Það er engin spurning um það, maður kallaði eftir því að einbeitingin þyrfti að vera til staðar í 90 mínútur plús og mér fannst hún vera það í dag. Auðvitað er erfitt að halda hreinu á móti svona góðu liði,“ sagði Kári við Stöð 2 Sport.

,,Við getum ekki sýnt 100 prósent einbeitingu gegn Portúgal tvisvar og svo ef menn ætla að velja sér leiki, það er bara hræðslan sem kveikir á mönnum. Þú verður að fara inn í alla leiki með því hugarfari að þetta geti endað illa og að himinn og jörð séu að farast ef þú tapar þessu.“

Kári ræddi svo landsliðsþjálfara Íslands, Age Hareide, sem hefur ekki upplifað auðvelt verkefni hingað til.

,,Honum til varnar hefur hann bara fengið keppnisleiki til að finna út hvað hans besta lið er og það er náttúrulega erfitt. Það eru margir í dag sem áttu flotta frammistöðu og gera tilkall til að festa sig í liðinu.“

,,Gummi Tóta var flottur í vinstri bakverðinum og við vitum að Jón Dagur er pirrandi fyrir andstæðinginn og leggur sig allan fram. Hjörtur var einnig flottur.“