Kári Árnason, yfirmaður knattspyrnumála hjá Víkingi var gestur í Íþróttavikunni um helgina. Þessi fyrrum landsliðsmaður í knattspyrnumaður fór víða yfir sviðið.

Farið var yfir fréttir vikunnar en Jón Rúnar Halldórsson, stjórnarmaður í ÍTF hefur bent á það stjórnvöld séu lítið að gera fyrir fótboltann og íþróttir í landinu.

Laugardalsvöllur er ekki leikhæfur þann tíma sem landsleikir fara fram og því stefnir í það að landsliðin okkar þurfi að leika heimaleiki erlendis á næsta ári.

„Það er mjög lítið, maður spyr sig hvort að það hefði átt að nota peningana sem komu vegna EM og HM inn. Borga þetta sjálf að hluta, það er ekkert til núna,“ segir Kári um stöðuna.

„Þú ert að treysta á að stjórnvöld geri eitthvað en þau gera ekki neitt. Það er endalaust talað um þetta, tími aðgerða er genginn í garð,“ segir Kári.

Talið er að karlalandsliðið leiki erlendis í mars þegar miði á Evrópumótið er í boði. „Maður hefur heyrt Malmö eða Manchester, þetta er eitthvað sem enginn vill. Þetta er mikill séns og góðar tekjur, í staðinn fara tekjurnar í allt annað. Þetta er galin staða,“ segir Kári.

Forráðamenn KSÍ eru farnir að skoða að leggja nýtt undirlag á Laugardalsvöll enda er ljóst að stjórnvöld og borgin munu ekki byggja nýjan völl á næstu árum

Talað hefur verið um að leggja gervigras á völlinn en Hrafnkell Freyr Ágústsson sér það ekki gerast. „Bara ekki séns, okkar bestu leikmenn hafa spilað í 15 plús ár á grasi. Fyrir þá að fara á gervigras væri skelfilegt,“ segir Hrafnkell.

Einnig er skoðað að setja Hybrid-gras sem Kári segir að það sé hin fullkomna leið. „Við sjáum hvernig þetta FH ævintýri gengur. Það er frábært hjá þeim, það er ekki spurning að setja Hybrid gras á Laugardalsvöll,“ segir Kári.

„Þetta er gras sem er hannað til fótbolta, það er miklu betra en venjulegt gras. Þú finnur ekki að það sé neitt gervigras, hann verður aldrei þungur eins og Laugardalsvöllur á það til að vera.“

Umræðan er hér að ofan.