Phil Neville hefur verið ráðinn þjálfari bandaríska knattspyrnuliðsins Portland Timbers. Ekki voru allir sáttir við ráðninguna.

Fyrrum knattspyrnumaðurinn hefur verið án starfs síðan hann var rekinn frá Inter Miami í sumar en hann hefur einnig stýrt enska kvennalandsliðinu.

Aðdáendahópur Portland Timbers lýsti yfir ósætti sínu við ráðninguna á Neville í ljósi ummæla kappans um konur á samfélagsmiðlum 2011 og 2012.

„Góðan daginn karlmenn. Tveir tímar af krikket fyrir vinnu. Stefnir í frábæran dag,“ skrifaði Neville til að mynda á árum áður og var þá spurður af hverju hann byði bara karlmönnum góðan dag.

„Ég hélt að konurnar væru of uppteknar við að undirbúa morgunmat og koma krökkunum af stað í skólann,“ svaraði Neville þá.

„Ég er afslappaður. Ég varð að berja eiginkonuna og líður mun betur núna,“ skrifaði hann í annarri færslu og í enn annarri stóð: „Þið konur viljið alltaf jafnrétti þar til kemur að því að borga reikningana.“

Neville segir að þessi gömlu ummæli séu langt frá hans gildum í dag.

„Ég ræddi þetta líka þegar ég tók við enska kvennalandsliðinu 2019. Þetta endurspeglar engan veginn mína persónu eða það hvernig ég var alinn upp af mömmu minni og pabba. 

Færslurnar eru eins rangar í dag og þær voru 2011. Mig langar að kynnast öllum í borginni og leyfa þeim að kynnast mér. Mig langar að okkar á milli ríki mikið traust,“ sagði Neville á blaðamannafundi.