„Þær eru allar heilar, allar klárar. Staðan á hópnum er góð,“ sagði Þorsteinn Halldórsson, þjálfari íslenska kvennalandsliðsins, á blaðamannafundi í Laugardalnum í dag.

Ísland tekur á móti stórliði Þýskalands í Þjóðadeildinni á morgun. Þetta er annar leikur liðsins í þessum glugga en Stelpurnar okkar töpuðu gegn Dönum á föstudag 0-1 þrátt fyrir fína frammistöðu.

„Við getum tekið margt jákvætt út úr þessu. Við héldum ágætlega í boltann og náðum nokkrum sinnum að spila í gegnum pressuna þeirra. Við unnum mikið af návígum og sköpuðum nokkuð mikið af færum. Það eru punktar sem við tökum með okkur en við ætlum að gera betur í stigasöfnun en í síðasta leik,“ sagði Þorsteinn.

Ísland mætti Þýskalandi ytra í síðasta mánuði og tapaði 4-0. Liðið er staðráðið í að gera betur annað kvöld.

„Þjóðverjarnir spila öðruvísi en Danir. Þær eru mikið að gefa fyrir en danska liðið sækir í gegnum miðsvæðið. Þjóðverjar áttu 44 fyrirgjafir í síðasta leik og við þurfum að verjast því.

Við vitum að þýska liðið er mjög gott og við sáum það gegn þeim síðast. En við viljum líka meina að það hafi verið lélegur leikur hjá okkur. Við bættum okkur í síðasta leik og þurfum að halda því áfram,“ sagði Þorsteinn í dag.

Leikur Íslands og Þýskalands hefst klukkan 19 annað kvöld á Laugardalsvelli. Miðasala er í fullum gangi á Tix.is og má nálgast miða með því að smella hér.