Greenwood er gjaldgengur í jamaíska landsliðið þar sem faðir hans er þaðan. Hefur hann spilað einn leik fyrir enska landsliðið og kom hann hér á Íslandi. Ólíklegt þykir að hann fái að spila með enska landsliðinu í framtíðinni vegna mála utan vallar sem flestum er kunnugt um.
„Hann er búinn að vera mikið í umræðunni, bæði fyrir gæði og það sem gekk á í hans einkalífi. En eins og aðrir þjálfarar vil ég hafa gæðaleikmenn í liðinu mínu. Ég ætla ekkert að fela það, ég væri spenntur fyrir því. En það er svo sem ekki mín ákvörðun. Það eru forsetinn, framkvæmdastjórinn og aðrir sem ákveða það hvort hann sé velkominn eða ekki. Þeir hafa báðir gefið það út að þeir myndu vilja fá hann. Dyrnar eru opnar fyrir hann ef hann vill koma til okkar,“ segir Heimir í viðtali við Stöð 2.
Heimir segir að sjálfur hafi Greenwood áhuga á að spila fyrir landslið Jamaíka.
„Hann hefur gefið það út og æfir meira að segja í landsliðsbúningi Jamaíku. Þannig að hann hefur gefið það í skyn,“
Heimir áttar sig á að það gæti orðið umdeilt að velja Greenwood í jamaíska landsliðið vegna sögu leikmannsins unga.
„Ég held að það sé eins og alls staðar, það eru alls konar skoðanir á því, og eðlilega. Hann fór til Spánar og það voru einhverjir sem voru á móti því og einhverjir með því. Þannig er það bara. Ég hef alltaf haft þá skoðun að allir eigi rétt á að fá annað tækifæri til að sýna sig og sanna. Maður fær ekki og nær ekki að þroskast nema maður geri mistök einhvers staðar á leiðinni og fái að bæta það upp.“
Viðtalið í heild á Stöð 2 má nálgast hér.
