„Yndislegt,“ sagði Gylfi Þór Sigurðsson í samtali við 433.is eftir að hafa slegið markametið hjá íslenska landsliðinu í kvöld. Í sínum fyrsta byrjunarliðsleik í tæp þrjú ár þá skoraði Gylfi tvö mörk í 4-0 sigri á Liechtenstein.

Með mörkunum tveimur hefur Gylfi því skorað 27 mörk fyrir Ísland og bætti þar með mat Eiðs Smára Guðjohnsen og Kolbeins Sigþórssonar sem báðir skoruðu 26 mörk fyrir liðið.

„Mjög ánægður, loksins að ná metinu. Ég hef beðið eftir þessu lengi og það var erfitt að spila ekki í tvö ár,“ sagði Gylfi Þór sem segist hafa hugsað um metið í gegnum þá erfiðu tíma þegar hann var í farbanni í Bretlandi.

„Ég hef hugsað um þetta lengi, að spila með strákunum og Íslandi var það sem mig langaði að gera.“

Hann segir að endurkoma í landsliðið hafi verið stærsta ástæða þess að hann ákvað að spila fótbolta aftur. „Ef það hefði ekki verið möguleiki þá hefði ég eflaust verið heima að horfa á leikinn í kvöld.“

Leikurinn í kvöld var fyrsti leikur Gylfa í byrjunarliði í rúm tvö ár. „Mér líður mjög vel, kuldinn hafði áhrif á vöðvana í fyrri leiknum. Leikurinn í kvöld var hægur og ekki mjög erfiður, fínn leikur fyrir mig til að byrja fyrsta leikinn.“

Viðtalið er í heild hér að neðan