„Ég hefði viljað koma inn á sama tíma,“ segir Aron Einar Gunnarsson, fyrirliði Íslands, léttur um þær móttökur sem Gylfi Þór Sigurðsson fékk þegar hann snéri aftur í íslenska landsliðið á föstudag.
Áhorfendur á Laugardalsvelli fögnuðu ákaft þegar Gylfa var skipt inn gegn Lúxemborg sem var hann fyrsti landsleikur í tæp þrjú ár.
„Hann á það skilið að fá þessar móttökur. Ég elska að spila með Gylfa, ég elska að hann sé kominn aftur til baka. Hann lyftir öllum upp, á æfingum og á hótelinu.“
„Hann er með þannig nærveru að menn vilja læra af honum og með honum. Hvað getur maður sagt meira um gæjann? Hann átti þetta skilið, hann er að verða betri með hverri æfingunni.“
Aron segir að það sé verkefni fyrir sig, Gylfa og aðra eldri leikmenn að skóla yngri leikmenn liðsins til.
„Við erum með marga leiki undir beltinu. Við tókum oft leiki og kláruðum þá. Það er undir okkur komið að vera leiðandi í því. Þetta er verkefni fyrir okkur líka, mér finnst þeir gefa orku líka. Þeir eru alveg að ýta okkur á æfingum, þó gamlir vinni oftast þá gefa þeir okkur orku. Það er okkar verkefni að leiða þá, kenna þeim í að klára svona leiki. Það er undir okkur komið.“
