Aron Einar Gunnarsson, fyrirliði Íslands í knattspyrnu, skrifar á Instagram fallega færslu um systur sína sem féll frá á dögunum. Tinna Björg Malmquist Gunnarsdóttir, systir Arons lést á dögunum.
Tinna var fertug þegar hún féll frá en útför hennar fór fram á Akureyri í síðustu viku. Aron Einar er sex árum yngri en Tinna.
„Elsku fallega og góða Tinna mín. Þín verður sárt saknað, þér var ætlað eitthvað meira og stærra þar sem þú ert,“ skrifar Aron á Instagram og birtir myndir með.
Tinna átti þrjú börn og ætlar Aron Einar og aðrir í fjölskyldunni að passa upp á þau. „Við pössum uppá litlu fjölskylduna þína. Hvíldu í friði elsku Tinna mín.“
View this post on Instagram
Tinna var eins og öll hennar fjölskylda mikill Þórsari og á heimasíðu félagsins eru skrifuð falleg orð um þessa ungu konu sem fór í blóma lífsins.
„Þessi orð eiga svo vel nú á þessari sorgar – og kveðjustund þegar við Þórsarar kveðju Tinnu Björg Malmquist Gunnarsdóttur í hinsta sinn. Ræturnar hennar er svo sannarlega gamalgrónar og rekjanlegar allt til upphafsins árið 1915 og alla tíð hefur sú fjölskylda er Tinna er sprottin af, vitað hvaðan þau komu og verið í hjarta sínu Þórsari,“ segir á vef félagsins
„Við Þórsarar allir nær og fjær lútum höfði. Dómur almættisins hefur og mun alltaf verða á stundum sem þessari óskiljanlegur, enn í ljósi hans og þess að honum verður ekki breytt, trúum við því að Tinnu Björgu sé nú ætlað veigamikið hlutverk á himnum í ljósinu eilífa, og hugur okkar og innileg samúð er hjá börnum hennar Tinnu, foreldrum og systkinum.“
