Það var rífandi stemming á Hringbraut á föstudagskvöld þegar Bjarni Helgason blaðamaður Morgunblaðsins mætti og ræddi fréttir vikunnar hjá Benna Bó ásamt Herði Snævar Jónssyni, fréttastjóra íþrótta hjá Torgi.
Kjartan Henry Finnbogason samdi við FH í vikunni eftir að KR rifti samningi hans síðasta haust, mál sem vakti gríðarlega athygli.
„Þeir eru að fá winner,“ sagði Bjarni Helgason um Kjartan sem hefur mikla reynslu og hefur sannað ágæti sitt um langt skeið.
„Gæi sem kann að vinna, maður er sleginn yfir þessu rugli sem var hjá KR. Ef ég væri KR-ingur þá væri ég illa pirraður.“
Hörður Snævar tók þá til máls. „FH vantar skrokka í hópinn og menn sem kunna þetta, stundum er talað um menn í hefndarhug. Ég treysti engum betur til að vera í hefndarhug en Kjartani, hann mun leggja sig 150 prósent fram.“
„Ég hef verið að ímynda mér hvernig hann fagnar þegar hann skorar á KR-vellinum, hann skorar 100 prósent. Hann mun sussa á Rúnar eða setjast á bekkinn, þetta verður epískt. Hann mun fagna.“
Umræðan er í heild hér að neðan.
