Gylfi Þór Sigurðsson ræddi ítarlega við 433.is eftir endurkomu sína á knattspyrnuvöllinn á föstudagskvöld. Kappinn spilar nú í Danmörku og var hann til að mynda spurður út í hvernig danskan væri í viðtalinu.

Gylfi kom inn á sem varamaður síðustu 20 mínúturnar í 1-1 jafntefli Íslendingaliðs Lyngby gegn Vejle á föstudag.

„Tilfinningin er mjög góð. Það er frábært að vera kominn aftur á völlinn. Auðvitað er svekkjandi hvernig fór en persónulega er ég mjög sáttur með að vera byrjaður að spila fótbolta aftur,“ sagði Gylfi meðal annars við 433.is eftir leik.

Sem fyrr segir var hann spurður út í hvort hann væri skarpur í dönskunni frá námsárunum eða hvort hann væri búinn að fara í tíma undanfarið.

„Nei, því miður ekki,“ svaraði Gylfi og hló.

„Það eru svo margir Íslendingar hérna að það þarf ekkert og svo vilja strákarnir hérna frá Danmörku tala ensku líka.

Maður sér smá eftir að hafa ekki fylgst aðeins betur með í dönsku í grunnskóla. Maður einbeitti sér meira að enskunni. En þetta hlýtur að koma á nokkrum mánuðum.“

Meira
Einkaviðtal við Gylfa Þór: Ræðir endurkomu kvöldsins á einlægan hátt – „Þetta var bara yndislegt“