Ung kona hefur reynt að ná athygli knattspyrnufélagsins Aston Villa og ræddi við enska miðla um vandamál utan vallar.
Um er að ræða hina 18 ára gömlu Aysha Kamal en hún og fjölmargir aðrir eru ósáttir með vinnubrögð enska stórliðsins.
Villa er nú að undirbúa það að stækka eigin heimavöll, Villa Park, og er talið að það verkefni muni kosta 100 milljónir punda.
Við hlið leikvangsins eru íbúðir í Birmingham og eru göturnar þar ávallt illa farnar eftir heimaleiki Villa.
,,Eftir hvern einasta leik þurfum við að taka upp glerbrot og matumbúðir, það er allt skilið eftir,“ sagði Aysha.
,,Það er lítill garður hliðina á húsinu okkar og þar má sjá dósir út um allt og ástandið er skelfilegt eftir heimalekina.“
,,Við fáum engan frið, rotturnar hafa gaman að þessu en það er allt saman. Ég skil ekki hvernig félagið getur eytt milljónum í leikmenn en ekki þrifið eftir sig ruslið.“
,,Fólki er alveg sama, þau öskra og garga og eru upptekin við það. Við þurfum að passa upp á það að koma okkur snemma í matvörubúð á leikdegi.“
