Ange Postecoglou er vongóður um að sínir menn mæti brjálaðir til leiks á sunnudaginn gegn Arsenal í grannaslag í ensku úrvalsdeildinni.

Postecoglou ætlar að hræða líftóruna úr Arsenal í þessum leik en Tottenham spilar afar skemmtilegan og hraðan sóknarbolta og hefur sýnt flotta takta á tímabilinu.

Ástralinn ætlar ekki að breyta leikstíl liðsins þó að um gríðarlega mikilvægan leik fyrir stuðningsmennina sé að ræða.

,,Varðandi hvernig við spilum, við erum ekki að fara að breyta okkar leik, vinur. Við ætlum að mæta til leiks og hræða líftóruna úr þeim,“ sagði Postecoglou.

,,Ég veit að þetta er grannaslagur og maður þarf að hugsa um það því viðureignin er mikilvæg fyrir stuðningsmennina.“

,,Ég var þjálfari Celtic og það var í raun aðeins einn leikur sem stuðningsmennirnir höfðu áhuga á,“ bætti Postecoglou við og á þar við stórslaginn gegn Rangers.