Íslenska kvennalandsliðið byrjar á flottum sigri í Þjóðadeildinni en leikið var gegn Wales nú í kvöld.

Um var að ræða fyrsta leik Íslands frá upphafi í keppninn en hún var nýlega stofnuð kvennamegin.

Aðeins eitt mark var skorað á Laugardalsvelli en það gerði fyrirliðinn okkar Glódís Perla Viggósdóttir.

Glódís skoraði eftir 18 mínútur í fyrri hálfleik og tryggði þrjú sterk stig í fyrsta leik riðilsins.

Þorsteinn Halldórsson, landsliðsþjálfari, ræddi leikinn eftir lokaflautið í kvöld og hafði skemmtilega hluti að segja.

,,Auðvitað tekur maður þrjú stig, ég er sáttur með varnarleikinn heilt yfir,“ sagði Þorsteinn við RÚV.

,,Við máttum alveg vera rólegri á boltanum þegar við unnum hann, það vantaði smá yfirvegun en við gerðum vel í seinni hálfleik og komumst í góðar stöður til að koma okkur í færi.“

,,Við tökum því alveg að þó að eitthvað lið liggi á okkur þá þarf okkur ekki að líða illa yfir því. Við vitum að welska liðið er gott en við hefðum viljað meiri ró á boltann.“

,,Við erum í ákveðnu breytingaferli og verðum að sætta okkur við ákveðna hluti og við sættum okkur alveg við sigur og þrjú stig. Fótbolti snýst um tvo hluti, að verjast og að sækja og ef við verjumst vel þá þurfum við bara að skora eitt mark til að vinna.“

,,Ég væri rekinn úr starfi ef ég myndi spila blússandi sóknarleik og tapa öllum leikjum sko, það er ekkert flókið. Við tökum þrjú stig og undirbúum okkur nú fyrir Þýskaland.“