Helgi Fannar Sigurðsson skrifar frá Kaupmannahöfn

Það er heldur betur eftirvænting fyrir kvöldinu hér í Lyngby því Gylfi Þór Sigurðsson gæti spilað sinn fyrsta knattspyrnuleik í meira en tvö ár. Þó nokkrir Íslendingar eru á vellinum. Þar á meðal eru Brynjar Kristmundsson, þjálfari Víkings Ólafsvíkur, og hans vinir.

„Það er búin að vera mikil spenna að sjá Gylfa spila aftur eftir tveggja ára pásu þannig við félagarnir ákváðum að nýta tækifærið og kíkja yfir til Köben til að sjá Gylfa spila,“ sagði Brynjar við 433.is fyrir utan leikvang Lyngby, þar sem er mikið húllumhæ.

„Við erum 13-14 manna hópur. Við erum búnir að tala við mikið af fólki hérna á svæðinu og eins og þau eru þau öll spennt að sjá Gylfa spila.“

Brynjar segist auðvelt að smitast af umhverfinu í Lyngby og er honum strax orðið annt um félagið á að vera hér í stuttan tíma.

„Já í rauninni (er maður orðinn harður stuðningsmaður liðsins), bara af því að vera hérna í 20 mínútur. Það er íslensk stemning hérna. Þetta er lítið fjölskyldufélag og fólkið hefur tekið vel á móti okkur,“ sagði Brynjar að endingu, en spjallið í heild er í spilaranum.