Nökkvi Þeyr Þórisson var í ítarlegu viðtali við STL Today í Bandaríkjunum eftir að hafa skrifað undir hjá St. Louis í landinu.
Nökkvi Þeyr gekk í raðir St. Louis fyrr á þessu ári og hefur skorað eitt mark í þremur leikjum fyrir MLS félagið.
Um er að ræða afar skemmtilegan leikmann en Nökkvi er 24 ára gamall og vakti fyrst athygli með KA áður en hann færði sig til Belgíu og svo Bandaríkjanna.
Kantmaðurinn á að baki einn landsleik fyrir Ísland sem kom á þessu ári en sem táningur var hann á mála hjá stórliði Hannover í Þýskalandi.
,,Þetta er fallegasta land jarðar, það er svo einfalt,“ sagði Nökkvi er hann ræddi Ísland í samtali við STL Today.
Nökkvi heldur svo áfram og talar um sín áhugamál en hann er afar hrifinn af hestum á meðan jafnaldrar hans eru mögulega að einbeita sér að tölvuleikjum.
,,Þetta áhugamál er öðruvísi, ég get fullyrt það. Alrir eru að spila tölvuleiki eða eitthvað þess háttar en þetta er mitt áhugamál.“
,,Faðir minn átti hesta þegar við vorum yngri og afi minn og amma upplifðu svipað. Það snerist mikið um hesta en vegna fótboltans þá fór ég ekki á bak. Við elskum þetta mikið bæði ég og bróðir minn.“
