Jermain Defoe fyrrum framherji Tottenham segir frá Hermanni Hreiðarssyni í nýjum hlaðvarpsþætti sínum, Defoe & Deeney Footballs First podcast.
Defoe og Hermann mættust nokkuð oft á ferlinum en voru líka samherjar í öflugu Portsmouth liði.
„Hermann Hreiðarsson hefur þá ímynd að hann sé harðhaus. Hann var einn sá ruglaðasti sem ég spilaði með,“ segir Defoe í hlaðvarpi sínu.
Defoe talar afar vel um Hermann og segir hann öðlingsdreng en segir einnig. „Hann var einn af þeim, þú mætir á morgnana og labbar framhjá honum og þú stressast upp og hugsar um að hann taki í þig. Hann er mjög ágengur.“
„Við vorum að spila gegn Charlton þegar ég var í Tottenham, það kemur horn og hann er að dekka mig. Ég er að reyna að fara frá honum og þá snýr hann sér við og bombar í magann á mér. Ég horfði á hann og hugsaði, af hverju væri hann að gera þetta?.“
„Hann er í öllum þessum hlutum, ég talaði við Darren Bent eftir leik og sagði honum að tala við Hermann en hann sagði að hann væri bara svona.“
Þeir urðu síðar samherjar hjá Portsmouth. „Ég skrifa undir hjá Portsmouth og fer inn í klefann, þar kemur Hermann og faðmar mig. Hann er einn ljúfasti maður sem ég hitti á ferlinum.“
