Enski boltinn

Íþróttavikan heldur áfram að rúlla á 433.is og í Sjónvarpi Símans undir hlekk Hringbrautar. Helgi Fannar Sigurðsson og Hrafnkell Freyr Ágústsson hafa umsjón með þættinum og í þetta sinn var gestur þeirra Bjarni Helgason, íþróttablaðamaður á Morgunblaðinu.

Jadon Sancho leikmaður Manchester United og stjóri liðsins Erik ten Hag eiga í stríði. Hollendingurinn valdi Sancho ekki í hóp í síðasta leik og sagði ástæðuna vera frammistöður hans á æfingum.

Sancho var allt annað en sáttur og svaraði fullum hálsi.

„Þetta er mjög skrýtið move hjá Ten Hag. Glugginn var að loka, þú ert með leikmann sem er ósáttur, af hverju ertu að taka hann fyrir á blaðamannafundi eftir tapleik? Hann gat bara sagt að hópurinn sé sterkur og að hann hafi ekki komist í hann. Þú þarft ekki að segja að hann hafi verið lélegur á æfingum. Þetta er bara bull,“ sagði Hrafnkell um málið.

Bjarni tók til máls.

„Þetta kristallar vandamál United. Það vildu allir fá þennan leikmann. Þeir borga honum bara allt of mikinn pening. Hann er ekki með neitt drive. Hann er uppalinn hjá City og er örugglega skítsama um United. Þetta er nákvæmlega eins og með Alexis Sanchez. Hann var búinn að vera frábær hjá Arsenal en svo kemur United og borgar honum allt of mikinn pening og hann getur ekki neitt.“

Umræðan í heild er í spilaranum.