Þorsteinn Halldórsson, þjálfari íslenska kvennalandsliðsins, segir að það þurfi að bæta aðstöðu fyrir knattspyrnulandsliðin og félagslið sem þurfa að nýta þjóðarleikvanginn sem fyrst.

Umræðan fór aftur af stað í kjölfar þess að Breiðablik tryggði sér sæti í riðlakeppni Sambandsdeildar Evrópu, fyrst íslenskra karlaliða.

Liðið þarf að spila á Laugardalsvelli þar sem Kópavogsvöllur er ekki löglegur en ljóst er að það mun kosta sitt að hafa þjóðarleikvanginn leikhæfan í nóvember, þegar Blikar eiga að spila tvo heimaleiki í riðlakeppninni.

„Það er skortur á aðstöðu. Það þarf að gera bragabót á því. Það er alveg ljóst að við erum í vandræðum, eins og Breiðablik núna í riðlakeppninni og við ef við förum í umspilsleiki í Þjóðadeildinni í febrúar. Við verðum líka í vandræðum í umspili karla í mars,“ segir Þorsteinn um málið við 433.is.

„Ég sé ekki hvernig við eigum að spila leik hérna í febrúar. Við þurfum að fara að gera eitthvað í þessu. Ég verð kominn á elliheimili áður en það kemur nýr völlur en það þarf samt að gera eitthvað.“

Yfirvöld hafa fyrir löngu lofað bættri aðstöðu en ekki staðið við það.

„Ráðamenn þurfa bara að hysja upp um sig buxurnar, framkvæma og hætta að taka myndir korteri fyrir kosningar. Það á enginn þeirra skilið að vera kosinn af fólki í íþróttahreyfingunni miðað við það sem þeir hafa gert.“

Hér ofar má sjá viðtalið við Þorstein í heild, en þar er einnig rætt um komandi leiki íslenska kvennalandsliðsins í Þjóðadeildinni.