Hörður Magnússon, knattspyrnukappi og einn dáðasti sjónvarpslýsandi landsins, er maður ekki einhamur. Hann sló í gegn á skákmóti í gær þar sem margir af sterkustu skákmönnum þjóðarinnar leiddu saman hesta sína, eða öllu heldur riddara.

Um var að ræða fimmta og síðasta mótið í svokallaðri Bankinn Bistro-hraðskáksmótaröð sem athafnamaðurinn og Óli Valur Steindórsson og hlaðvarpskóngarnir Birkir Karl Sigurðsson og Leifur Þorsteinsson, umsjónarmenn Chess after dark, eiga heiðurinn af.

Í mótunum fimm hafa helstu skákkempur landsins barist um að vinna sér þátttökurétt í lokamótinu, sem fer fram 21. október næstkomandi, þar sem tólf bestu keppendurnir koma til með að berjast um sigurinn í mótaröðinni.

Mótið er hins vegar opið öllum keppendum og Höddi Magg var einn þeirra sem lét slag standa. Kappinn sýndi svo sannarlega hvað í sér býr og landaði fimm vinningum af 11 mögulegum í hinu ógnarsterka móti og lágu meðal annars margfaldur Íslandsmeistari kvenna, Lenka Ptacnikova og unglingalandsliðsmaðurinn Alexander Oliver Mai í valnum.

Fór það svo að Hörður vann til gullverðlauna skákmanna undir 1600 stigum í mótinu og mokaði svo inn skákstigum að hann þarf að kveðja þann flokk í bili.

Sagði kappinn í færslu á Facebook-síðu sinni að hann væri eiginlega sjálfur undrandi yfir árangri sínum. Vonir standa til að Höddi láti ekki þar við sitja við skákborðið enda úrvals íþrótt fyrir gamlar knattspyrnukempur sem þurfa ekki að láta gömul meiðsli aftra sér í baráttunni.

Sigurvegari mótsins var nýjasti stórmeistari Íslendinga, Vignir Vatnar Stefánsson en hann lagði kollega sinn, stórmeistarann Hannes Hlífar Stefánsson í bráðabanaskák um sigurinn. Eru þeir félagar líklegir til afreka í lokamótinu eftir rúman mánuð.