Jordan Henderson hefur verið mikið gagnrýndur eftir að hann ákvað að yfirgefa Liverpool í sumar og elta peningana til Sádi-Arabíu. Hann ræddi málið í nýju viðtali.

Hinn 33 ára gamli Henderson er talinn fá um 700 þúsund pund í vikulaun hjá Al Ettifaq í Sádí. Gagnrýnin á hann hefur aðallega snúið að því að hann hefur verið ötull talsmaður hinsegin samfélagsins, en samkynhneigð er til að mynda bönnuð í Sádí.

„Hvað varðar LGBTQ+ samfélagið skil ég reiði þeirra. Mér þykir leitt að þeim líði þannig,“ segir Henderson.

„Það var aldrei ætlun mín að særa neinn. Ég hef alltaf reynt að hjálpa málstöðum og samfélögum sem hafa óskað eftir því.“

Útilokar ekki að bera regnbogaband

Henderson segir að skoðanir hans séu enn þær sömu og að hann trúi því að hann geti haft áhrif á menninguna í Sádí innan frá.

„Við getum öll stungið höfðinu ofan í sandinn og gagnrýnt hina og þessa menningu í löndum sem eru langt í burtu. En þá gerist ekki neitt. Ekkert mun breytast.

Ég held að fólk viti hverjar skoðanir mínar voru og eru enn. Ég held að það sé bara gott að slík viðhorf innan Sádi-Arabíu líka.“

Þegar Henderson var kynntur til leiks í Sádí var regnbogafyrirliðaband sem hann hafði borið hjá Liverpool litað svart og hvítt. Hann segist ekki hafa vitað af þessu og myndi meira að segja íhuga að vera með regnbogafyrirliðaband í leik í sádiarabísku deildinni.

„Ég ætla ekki að útiloka það en á sama tíma myndi ég ekki vilja vanvirða menninguna og trúna í Sádi-Arabíu. Ef við ætlum að segja að allir eigi að fá að vera eins og þeir vilja verðum við að virða alla.“