Sóli Hólm er nýjasti gestur Íþróttavikunnar, sem sýnd er í Sjónvarpi Símans undir hlekk Hringbrautar og á 433.is. Helgi Fannar Sigurðsson og Hrafnkell Freyr Ágústsson hafa umsjón með þættinum.

Það vakti mikla athygli þegar Breiðablik mætti aðeins um hálftíma fyrir leik gegn Víkingi í Bestu deild karla um síðustu helgi. Liðið mætti á rútu og fór ekki í klefa Víkings heldur beint út á völl.

„Blikastuðningsmenn vildu meina að þetta væri yfirlýsing til KSÍ eða þá á Víking fyrir að hafa ekki viljað fresta leiknum. Svo kom allt í einu eftir á skýringin að þetta væru klefarnir. Mér fannst það draga úr því að þetta væri eitthvað kúl. Ef þú ætlar að vera með statement, vertu þá harður á því,“ sagði Helgi í þættinum.

„Það er svolítið leiðinlegt að þetta sé ekki eitthvað skýrt og gott statement. Þetta er svipað og þegar maður reif kjaft við stóran krakka á skólavellinum, svo ætlaði maður að fara að standa undir því en þá bakkaði maður og koðnaði niður,“ sagði Sóli og bætti við. „En mér finnst geggjað að gera þetta og ég elska allt svona.

Ég skil þetta pínu því ég er mikið backstage í vinnunni og ef þú veist að þú ert að fara að bíða í einhverri diskageymslu, þá bíðurðu eins lengi og þú getur.“

Sóli var þá spurður út í skrýtnustu reynsluna fyrir skemmtun.

„Það er ekkert eitt sem er skrýtnast en rosalega oft er ég inni í einvhverju eldhúsi og er fyrir. Það er helvíti algengt og leiðinlegt.“

Umræðan í heild er í spilaranum.