Manchester United tilkynnti í dag um ákvörðun sína að Mason Greenwood myndi ekki snúa aftur í liðið eftir mikla óvissu undanfarið. United goðsögnin Gary Neville gagnrýnir félagið harðlega vegna þess hvernig staðið var að málinu.
Greenwood hefur ekki æft eða spilað með United í átján mánuði eftir að unnusta hans sakaði hann um nauðgun og ofbeldi í nánu sambandi.
Málið var fellt niður fyrr á þessu ári og hefur Manchester United síðan skoðað málið hjá sér.
Nú er niðurstaða komin í málið og telur félagið heppilegst að Greenwood haldi knattspyrnuferli sínum áfram annars staðar en hjá United.
Neville styður ákvörðun United en gagnrýnir hvernig félagið hefur staðið að málinu.
„Ég held að fyrir mér og öllum öðrum sem sáu sönnunargagnið sem upphaflega var birt hafi verið ljóst að hann myndi ekki spila aftur fyrir Manchester United. En ferlið til að komast að þessari niðurstöðu var skelfilegt,“ segir Neville.
„Þegar þú ert að takast á við eitthvað svona þarftu sterka og ákveðna leiðtoga. Manchester United hefur þá ekki.“
Neville telur að það þurfi staðlað ferli sem svona mál fari í til að ábyrgðin sé ekki öll á félögunum.
„Þegar kemur að málum eins og heimilisofbeldi gegn konum þarf að vera einhver sjálfstæður dómstóll. Manchester United ætti ekki að vera dómari og dómstóll í þessari stöðu, ekki bara fyrir félagið heldur leikinn í heild.“
