Enski miðillinn Sun fer ekki beint fögrum orðum um íslenska landsliðsmarkmanninn Rúnar Alex Rúnarsson.

Sun fjallar um skipti Rúnars til Cardiff en hann skrifaði undir samning við welska félagið í gær.

Rúnar er landsliðsmarkvörður Íslands og er öflugur á milli stanganna en hann lék alls sex leiki fyrir Arsenal á sínum tíma.

Rúnar fékk að spila leiki í Evrópudeildinni með Arsenal til að byrja með og lék einnig gegn Manchester City í deildabikarnum 2020.

Þar gerði Rúnar slæm mistök í marki Arsenal en hann fór síðar til Tyrklands, Belgíu og nú Wales á láni.

,,Arsenal stuðningsmenn muna eftir honum fyrir hörmulega frammistöðu gegn Manchester City í deildabikarnum í desember 2020,“ kemur fram í the Sun.

,,City skoraði eftir aðeins 125 sekúndur þegar Rúnarsson kýldi loftið frekar en boltann sem leyfði Gabriel Jesus að skora.“

,,Kvöldið varð miklu verra þegar hann kýldi aukaspyrnu Riyad Mahrez í sitt eigið net. Hann var ekki heillandi í næstu tveimur mörkum heldur þar sem City vann sannfærandi 4-1 sigur.“

Rúnar átti ekki sinn besta leik það kvöld en enski miðillinn sparar ekki stóru orðin og má gagnrýnin teljast nokkuð hörð enda var Íslendingurinn að reyna fyrir sér fyrir eitt stærsta félag Englands og fékk lítinn tíma til að aðlagast.