Leikmannahópur Borussia Dortmund er feginn að Jude Bellingham hafi farið til Real Madrid í sumar. Menn voru orðnir þreyttir á hegðun hans. Bild fjallar um málið.

Tíðindin koma mörgum á óvart. Bellingham var hjá Dortmund frá 2020 til 2023 og var oft með fyrirliðabandið á síðustu leiktíð.

Í sumar var hann svo seldur til Real Madrid fyrir 113 milljónir punda.

Í umfjöllun Bild kemur fram að einhverjir leikmenn hafi verið komnir með nóg af því að Bellingham vildi alltaf vera miðpunktur athyglinnar.

Þar segir einnig að enski miðjumaðurinn, sem varð tvítugur fyrr í sumar, hafi átt erfitt með að Erling Braut Haaland tæki sviðsljósið. Norski framherjinn var stærsta stjarna Dortmund áður en hann var seldur til Manchester City sumarið 2022.

Þarna á Bellingham að hafa tekið upp á því að bíða eftir að liðsfélagar sínir væru farnir til búningsherbergja áður en hann þakkaði stuðningsmönnum fyrir leikinn til að þurfa ekki að deila athyglinni með þeim.

Þá fannst mörgum leikmönnum Dortmund Bellingham ekki sýna mikla leiðtogahæfni þrátt fyrir að bera oft fyrirliðabandið og að hann væri stöðugt pirraður. Þetta er sagt hafa búið til slæma stemningu í hópnum.

Bellingham er einnig gefið að sök að hafa hreytt ljótum ummælum í liðsfélaga, eins og Nico Schulz í leik gegn Rangers. „Þú getur ekki sent boltann. Þú ert svo ömurlegur,“ á hann að hafa sagt.