The Telegraph hefur birt ansi athyglisverða grein þar sem fjallað er um samband Pep Guardiola og Phil Foden.

Foden er ein skærasta stjarna Englands en hefur samt sem áður ekki alltaf átt fast sæti í liði Man City né enska landsliðinu.

Það er þó ekki hægt að neita hæfileikum leikmannsins en hann er enn efnilegur og aðeins 23 ára gamall.

Telegraph birtir samskipti á milli Guardiola og Foden í leik gegn Porto í Meistaradeildinni á sínum tíma þar sem sá spænski áttaði sig á því að hann gæti treyst Foden fyrir hlutverki í aðalliðinu.

,,Andskotinn Phil, andskotinn hafi það. Þú gerðir alls ekki það sem ég bað um,“ öskraði Guardiola á Foden sem tók aukaspyrnu í leiknum en á sinn eigin hátt.

Eftir leik þá svaraði Foden fyrir sig fullum hálsi og var ekki ánægður með framkomu þjálfara síns að sögn Telegraph.

,,Aldrei tala svona við mig aftur. Þú myndir ekki koma svona fram við aðra leikmenn,“ á Foden að hafa sagt.

Greint er frá því að Guardiola hafi degi seinna beðist afsökunar á hegðun sinni en atvikið átti sér stað fyrir um þremur árum.