Stuðningsmenn Liverpool fengu miklar gleðifregnir í nótt því Moises Caicedo er á leið til félagsins frá Brighton.

Caicedo hefur verið gríðarlega eftirsóttur í allt sumar eftir frábæra frammistöðu með Brighton.

Hjá Brighton eru menn hins vegar harðir í horn að taka í samningaviðræðum og því alls ekki ódýr.

Liverpool greiðir 111 milljónir punda fyrir Caicedo og verður hann um leið dýrasti leikmaður sem keyptur er til bresks félags frá upphafi.

Chelsea hafði einnig verið á höttunum eftir Caicedo og var líklegra til að fá hann um tíma. Brighton gaf frest til miðnættis í gær til að bjóða í miðjumanninn og ákvað að hann færi til hæstbjóðanda, að því gefnu að gengið væri að verðmiða félagsins.

Þar kom í ljós að Liverpool var til í að greiða 111 milljónir punda en Chelsea aðeins 100 milljónir punda. Þá sagðist leikmaðurinn sjálfur vilja fara til Liverpool.

Jurgen Klopp hefur verið að endurnýja miðsvæði sitt í sumar. Alexis Mac Allister og Dominik Szoboszlai eru þegar komnir, en sá fyrrnefndi kom einmitt frá Brighton.

Brighton keypti Caicedo á 4,5 milljónir punda frá Independiente del Valle í Ekvador og græðir því gríðarlega á leikmanninum.