John Andrews, þjálfari kvennaliðs Víkings, er að vonum spenntur fyrir bikarúrslitaleiknum gegn Breiðabliki á föstudag. Hann gerir sér þó grein fyrir að verkefnið er strembið.
„Við getum ekki beðið. Að sjá völlinn og æfa hér í dag, þetta verður mjög gaman,“ segir John í samtali við 433.is.
„Við þurfum að vera raunsæ. Breiðablik er með frábært lið. En við erum ekki með svo slæmt lið heldur. Bæði lið spiluðu erfiða leiki til að komast í úrslit. Við erum nokkuð bjartsýn.“
John býst við góðum stuðningi úr stúkunni.
„Stuðningsmenn Víkings hafa verið ótrúlegir. Ég held að fyrsta daginn hafi selst næstum 500 miðar. Við erum stolt af því.“
Víkingur hefur átt frábært tímabil. Liðið er á toppi Lengjudeildarinnar og komið alla leið í bikarúrslitaleikinn. John segir afar gaman að vera hluti af félaginu og að kvennaliðið horfi einnig til karlaliðsins sem hefur verið frábært undanfarin ár.
„Þeir eru ótrúlegir. Við erum að vinna hörðum höndum að því að komast á þann stað. Lengjudeildin í ár er sú besta sem hefur verið og við erum svo heppin að vera á toppnum þar. En þú þarft bara að horfa á síðustu þrjá leiki okkar gegn Fram, Fjarðabyggð og Augnablik. Þau eru í neðri hlutanum og gáfu okkur mjög erfiða leiki.
Þetta er ekki bara Lengjudeildin eða Besta deildin, íslensk kvennaknattspyrna er búin að ná frábærum framförum og það er heiður að vera hluti af því.“
Nánar er rætt við John í spilaranum.
Leikurinn hefst klukkan 19 á föstudag.
