Gabriel Jesus verður ekki með Arsenal á fyrstu vikum nýs tímabils vegna meiðsla á hné.

Þetta er mikið áfall fyrir Arsenal en Jesus er lykilmaður.

Hann var ekki með Arsenal gegn Monaco í Emirates Cup í gær og sagði Mikel Arteta eftir leik að framherjinn hafi farið í aðgerð.

„Hann var að glíma við meiðsli á hné og við þurftum að leysa það,“ sagði spænski stjórinn.

Jesus mun því missa af leiknum gegn Manchester City um Samfélagsskjöldinn á sunnudag sem og fyrsta leik tímabilsins gegn Nottingham Forest helgina eftir það. Búast má við því að leikirnir verði fleiri.

Jesus glímdi einnig við sömu meiðsli í vetur og var frá í þrjá mánuði.

„Þetta er ekki mjög stórt en honum hefur liðið óþægilega undanfarnar vikur. Þetta tengist fyrri meiðslum hans. Þetta hefur pirrað hann og það þurfti að leysa. Við þurftum að taka ákvörðun og vildum við verja leikmanninn, ná honum til baka eins fljótt og hægt er. Við töldum best að láta skurðlækninn laga þetta,“ sagði Arteta.