Þrjú félög hafa áhuga á að fá Þorra Mar Þórisson til liðs við sig frá KA um þessar mundir. Tvö þeirra eru innlend og eitt erlent. Sævar Pétursson, framkvæmdastjóri KA, segir frá þessu í samtali við 433.is.

Það vakti athygli margra að Þorri var ekki í leikmannahópi KA í síðasta leik gegn KA. Sævar segir fjarveru hans þar þó ekki tengjast hugsanlegum félagaskiptum, hann hafi einfaldlega ekki verið valinn í hópinn líkt og Ásgeir Sigurgeirsson í sama leik.

Hins vegar er áhugi á Þorra innanlands sem og erlendis og hafa tvö íslensk félög þegar boðið í bakvörðinn.

„Eins og staðan er hefur það ekki farið lengra en það að við höfum sagt nei,“ segir Sævar við 433.is í morgunsárið.

Hann útilokar þó ekki að Þorri yfirgefi KA í glugganum. „Það kemur til greina að selja alla leikmenn.“

Sævar vildi ekki fara nánar út í hvaða íslensku félög hafa boðið í Þorra en samkvæmt heimildum 433.is er eitt þeirra Valur.

Þá er eitt erlent félag sem Sævar segir hafa lýst yfir áhuga á Þorra.

Lið KA er mætt til Dublin þar sem það mætir Dundalk í seinni leik liðanna í 2. umferð forkeppni Sambandsdeildarinnar á fimmtudag. Fyrri leik liðanna lauk með 3-1 sigri KA hér heima og liðið því í sterkri stöðu.