Margir spáðu Grindvíkingum toppsætinu í Lengjudeild karla fyrir tímabil en gengið hefur verið arfaslakt. Eftir fína byrjun á tímabilinu er liðið nú í tíunda sæti, 4 stigum fyrir ofan fallsvæðið.
Helgi er nú hættur sem þjálfari Grindavíkur og sagði formaður félagsins, Haukur Guðberg Einarsson, í samtali við 433.is að ákvörðunin hafi verið tekin af frumkvæði Helga.
„Hann hefur hallast að því að hann gæti ekki náð meira út úr þessu liði og að þetta væri bara búið,“ sagði Hrafnkell Freyr Ágústsson, sérfræðingur 433.is um Lengjudeildina, í þættinum.
„Það var lítið að frétta fram á við og varnarlega voru þeir orðnir töluvert slakari en í byrjun móts. Ég held það sé best fyrir alla að finna nýjan þjálfara sem getur blásið lífi í þetta.“
Hrafnkell hrósar Helga fyrir að taka ákvörðunina sjálfur.
„Það er vel gert hjá Helga og segir kannski mikið um týpuna sem hann hefur að geyma. Hann hefur verið sanngjarn í öllum viðtölum, aldrei verið eitthvað trylltur eða misst hausinn.“
Hrafnkell var svo spurður út í það hvern hann sæji taka við sem þjálfari Grindavíkur.
„Sigurður Heiðar Höskuldsson (aðstoðarþjálfari Vals) með alvöru budget gæti gert góða hluti. Ég held það væri góð ráðning fyrir næsta tímabil til lengri tíma, að fá hann inn í fullt starf.
Óli Jó og Gústi Gylfa gætu komið inn í þetta núna og blásið lífi í þetta restina af mótinu.“
Verði nýr þjálfari ekki fundinn fyrir næsta leik Grindavíkur gegn gegn Vestra á miðvikudag verður Milan Stefán Jankovic aðalþjálfari í þeim leik.
