Það má búast við niðurstöðu um framtíð Mason Greenwood hjá Manchester United á allra næstunni ef marka má nýjustu fréttir frá Englandi.

Greenwood hefur ekki spilað fótbolta í eitt og hálft ár eftir að lögreglan í Manchester handtók hann.

Var Greenwood grunaður um kynferðisbrot og annað ofbeldi í nánu sambandi. Málið var fellt niður fyrir nokkru síðan en United hefur síðan þá skoðað málið.

Niðurstaða virðist ekki enn liggja fyrir en samkvæmt enskum miðlum gerir United sér grein fyrir því að það þurfi að leysa málið fyrir upphaf nýs tímabils á Englandi.

Það gæti því enn farið svo að Greenwood spili með United á næstu leiktíð, en hann hefur einnig verið orðaður annað, til dæmis til Ítalíu.

Tímabilið í ensku úrvalsdeildinni hefst 11. ágúst og má því búast við niðurstöðu í þessari viku eða þeirri næstu.