Formaður Grindavíkur, Haukur Guðberg Einarsson, staðfesti við 433.is í gær að starf Helga Sigurðssonar þjálfara væri ekki í neinni hættu þrátt fyrir slæmt gengi undanfarið. Þetta var til umræðu í hlaðvarpi Lengjudeildarinnar hér á 433.is.

Grindavík var af mörgum spáð toppsæti Lengjudeildar karla fyrir tímabil en gengið hefur verið undir væntingum. Nú hefur liðið tapað þremur leikjum í röð og aðeins unnið einn af síðustu níu í deild.

Helgi verður þó áfram við stjórnvölinn.

„Mér finnst það áhugavert. Ég bjóst við því eftir svona mörg töp í röð með þetta lið að starf hans væri í hættu. Þeir sjá þetta kannski einhvern veginn öðruvísi,“ segir Hrafnkell Freyr Ágústsson, sérfræðingur 433.is um Lengjudeildina.

Það er nóg að ná fimmt sæti í deildinni til að fara í umspil um sæti í efstu deild og telur Hrafnkell að stjórnin sé með það á bak við eyrað.

„Þeir horfa væntanlega í það að ef þeir koma sér inn í þessa úrslitakeppni, það væri skandall ef þeir gera það ekki, þá eru þeir með reynslumikið lið sem mun hjálpa þeim þar. Ég hef engar áhyggjur af mönnum eins og Guðjóni Pétri og Óskari Erni í úrslitakeppninni.

Ef Grindavík ætlar ekki að reka Helga þurfa þeir samt aðeins að fara að hugsa þetta frá grunni. Segjum að Grindavík fari upp, það er fullt af leikmönnum þarna í kringum 35 ára sem maður er ekkert viss um að höndli efstu deild, sama hvort þeir hafi gert það áður.“