Óskar Hrafn Þorvaldsson þjálfari Breiðabliks segir að hans menn verði eingöngu að horfa á verkefnið fyrir framan sig, einvígið gegn FC Kaupmannahöfn í Meistaradeildinni á morgun, en ekki lengra. Hann er brattur fyrir leik liðanna.
Blikar taka á móti dönsku meisturunum í FCK annað kvöld á Kópavogsvelli og fer seinni leikurinn fram á Parken í næstu viku. Íslandsmeistararnir unnu Shamrock Rovers í fyrstu umferð og með því er ljóst að Blikar eru öruggir með umspilsleik um sæti í Sambandsdeildinni, þó svo að tap gegn FCK verði niðurstaðan.
„Við förum í alla leiki til að vinna þá. Við áttum okkur á því að verkefnið er ærið. FCK vann tvöfalt á síðasta tímabili, er með mikla Evrópusögu og mjög öflugt lið. Það er engin önnur leið að nálgast þennan leik en að ætla að vinna hann,“ segir Óskar við 433.is.
Óskar og hans menn horfa eingöngu á einvígið við FCK sem er framundan og hugsa ekki um framhaldið í Evrópukeppni eftir það.
„Lykilatriði fyrir okkur er að ná upp almennilegu orkustigi, ná upp ákefð í pressuna og vera mjög kröftugir. Þegar það er í lagi, varnarleikurinn er góður, þá fylgir yfirleitt hitt með. Þá verður sóknarleikurinn betri.
Við eigum enga möguleika í þessu einvígi nema við séum við sjálfir, þorum að spila, stíga hátt upp á þá, berum ekki of mikla virðingu fyrir þeim. Við þurfum að passa okkur á að lenda ekki í að þetta einvígi verði einhver biðstofa fyrir komandi leiki. Þetta er einvígið sem við þurfum að einbeita okkur að núna. Það eru möguleikar í þessu einvígi þó FCK sé sigurstranglegri aðilinn og stærra félag.“
Ljóst er að fyrri leikurinn hér heima er afar mikilvægur upp á möguleika Breiðabliks á að fara áfram. Óskar og leikmenn gera sér grein fyrir því.
„Brekkan verður brattari ef þú vinnur ekki heimaleikinn. Það er að sjálfsögðu markmiðið okkar. Við þurfum að ná í góð úrslit hér til að eiga möguleika.“
En mun gervigrasið hjálpa Blikum gegn gríðarsterku liði FCK?
„Það getur gert það en það hjálpar ekkert ef við erum ekki á toppnum okkar, ef við spilum ekki eins nálægt hámarksgetu og mögulegt er. Þá skiptir engu máli á hvaða undirlagi við erum eða hvar við erum. Fyrst og síðast þurfum við að spila vel, leggja okkur fram, vera trúir því sem við stöndum fyrir.“
Blikar hafa verið í góðum takti undanfarið í deild og Evrópu.
„Það hjálpar til þegar þú spilar mikið af leikjum. Þá kemur takturinn fyrr. Við erum lið sem þarf á að halda að vera í takti. Mér finnst takturinn í liðinu ágætur núna. Undanfarin þrjú ár hefur þetta verið tíminn sem við stígum upp og gefum í. Vonandi verður það sama uppi á teningnum núna,“ segir Óskar Hrafn Þorvaldsson.
Viðtalið í heild er í spilaranum
