Það var alls ekki auðvelt fyrir fyrrum knattspyrnumanninn Peter Crouch að venjast því að spila fótbolta í meistaraflokki.

Crouch var ansi einstakur leikmaður en hann er gríðarlega hávaxinn og var fituprósentan á sama tíma alls ekki mikil.

Crouch var ‘slánalegur’ ef eitthvað en hann varð fyrir miklu áreiti er hann hóf feril sinn hjá Queens Park Rangers.

Síðar lék Crouch leiki fyrir enska landsliðið og var ekki of lengi að venjast því sem sungið var um hann í stúkunni.

,,Að komast í liðið var bara hluti af þessu. Það áreiti sem ég þurfti að upplifa var nýtt fyrir mér og það opnaði augun. Þetta var fyrsta tímabilið mitt sem atvinnumaður og við heimsóttum West Brom,“ sagði Crouch.

,,Ég kom inná sem varamaður og áhorfendurnir hlógu að mér, ég fann fyrir þessu öllu. Það var bara vegna þess hvernig ég leit út, enginn af þeim hafði séð mig spila.“

,,Síðar kom annar leikur gegn Gillingham á útivelli þar sem þeir drulluðu yfir mig. Ég held að allir á vellinum hafi sungið lög um mig.“