433.is sagði frá því í gær að Gylfi Þór Sigurðsson væri í viðræðum við DC United í Bandaríkjunum. Síðan að frétt okkar birtist hafa margir stærstu fjölmiðlar í heimi sagt frá málinu.

Ensk blöð sögðu fyrr í dag að Gylfi Þór væri væntanlegur til Washinghton í dag til að ræða við félagið og Wayne Rooney þjálfara liðsins.

The Athletic segir svo frá málinu en þar kemur fram að viðræður um kaup og kjör séu ekki langt komnar. „Samningurinn er enn á byrjunarstigi og ekkert formlegt tilboð hefur verið lagt fram,“ segir í grein The Athletic.

Þjálfari DC United er Wayne Rooney fyrrum samherji Gylfa Þórs hjá Everton. Með liðinu leikur svo hinn öflugi Guðlaugur Victor Pálsson.

Gylfi Þór fagnar 34 ára afmæli sínu í haust en fyrir utan eitt og hálft ár í Þýskalandi hefur Gylfi verið búsettur í Bretlandi frá árinu 2005.

Samningur hans við Everton rann út fyrir ári síðan en rannsókn á máli hans í Bretlandi var felld niður í vor þar sem engar líkur voru taldar á að hann yrði dæmdur fyrir meint brot.

„Þetta er mjög langur tími sem hann hefur ekki getað spilað fótbolta. Í ljósi niðurstöðu málsins þá vona ég að hann geti fundið leiðina aftur inn í leikinn. Það er enginn ástæða fyrir því að hann ætti ekki að geta það,“ sagði Mark Haslam lögmaður Gylfa Þórs í samtali við 433.is á sínum tíma.