Fylkir hefur verið á fínu skriði undanfarið í Bestu deild karla. Liðið var til umræðu í Tilþrifunum á Stöð 2 Sport í kvöld.

Fylkir gerði 3-3 jafntefli við KR í kvöld. Liðið er ósigrað í þremur leikjum eftir erfiða byrjun.

Rúnar Páll Sigmundsson bætti litlu við leikmannahóp sinn fyrir tímabilið og fékk nokkra gagnrýni fyrir það.

„Við skulum orða þetta þannig að Fylkir er eitt af fáum félögum í efstu deild sem eru reknir af ábyrgð. Það er ekki verið að reyna að hrúga inn leikmönnum til að halda sér í deildinni.

Þannig á ekki að reka nokkurn hlut þó sumir taki upp á því í íslenskum fótbolta,“ sagði Þorkell Máni Pétursson beittur í þætti kvöldsins.

Fyrir mót og í upphafi þess var talað um að Fylkir gæti orðið fallbyssufóður.

„Ég átti mjög erfitt með að skilja það. Það var eins og menn hefðu aldrei séð Rúnar setja saman fótboltalið.“