Erik ten Hag stjóri Manchester United var nokkuð harður eftir sigur á Chelsea í gær og krafðist þess að fá betri leikmenn ef hann á að fara lengra með liðið.

United tryggði sér Meistaradeildarsæti í gær, þá hefur liðið unnið enska deildarbikarinn og er í úrslitum enska bikarsins eftir átta daga.

Þetta fyrsta tímabil Ten Hag hefur því verið vel heppnað en hann setur meiri kröfur á Manchester United og vill betri leikmenn til að gera meira.

„Þetta er góður grunnur hérna en við verðum að hækka standardinn hérna, við verðum að vinna mikið í sumar með hópinn en við verðum líka að styrkja hópinn,“ segir Ten Hag.

„Við viljum berjast um sigur í deildinni en það þarf að vera raunhæft. Núna erum við langt á eftir og það er mikil vinna en við þurfum líka betri leikmenn til að berjast um það stærsta.“