KA hefur ákveðið að fljúga Norðmönnunum ungu heim frá Noregi til þess að taka þátt í leiknum gegn Víking í Bestu deild karla í kvöld. Frá þessu er greint í Þungavigtinni.

Kristoffer Forgaard Paulsen og Ingimar Torbjörnsson Stöle komu til KA frá Viking í Noregi fyrir tímabilið. Þeir héldu heim á dögunum til að taka próf í skóla sínum.

Þeir félagar voru ekki með gegn Breiðablik um helgina en vegna meiðsla í vörn KA hefur félagið ákveðið að fljúga þeim til landsins og aftur út svo til að klára prófin.

„Þeir sóttu tvo unga Norðmenn sem hafa staðið sig ágætlega, þeir eru í prófatörn í Noregi,“ sagði Kristján Óli í Þungavigtinni í gærkvöldi.

Hann segir að þeim verði flogið Íslands. „Þeim verður flogið í þennan leik og svo aftur til Noregs. Það segir mest um varnar krísu KA en þeir voru ekkert í hóp gegn Breiðablik, voru bara í Noregi,“ segir Kristján.

Ingimar skrifaði undir þriggja ára samning við KA en Kristoffer kom á láni.

Ingimar sem varð 19 ára á dögunum er spennandi íslenskur kantmaður sem hefur verið viðloðandi yngrilandslið Íslands undanfarin ár og hefur meðal annars leikið tvo leiki með U19 ára landsliðinu. Hann hefur alla tíð búið í Noregi en þó leikið nokkur sumur með liði Fjölnis og þekkir því gula og bláa litinn ansi vel.

Þá skrifaði norski varnarmaðurinn Kristoffer Forgaard Paulsen undir eins árs lánsamning og leikur því með KA í sumar. Kristoffer sem er 19 ára er einnig afar spennandi leikmaður en hann er 192 cm á hæð.

Víkingur hefur unnið alla átta leiki sína í Bestu deildinni til þessa en leikurinn hefst klukkan 18:00 á Akureyri.