Íþróttavikan er komin á fulla ferð hér á 433.is og í Sjónvarpi símans. Helgi Fannar Sigurðsson og Hrafnkell Freyr Ágústsson fá til sín góða gesti í hverri viku og ræða það helsta úr heimi íþrótta. Í þetta sinn var gesturinn fyrrum Alþingismaðurinn Brynjar Níelsson.
Age Hareide landsliðsþjálfari karla sagði á dögunum í viðtali við mbl.is að hann vildi fá Gylfa Þór Sigurðsson aftur í landsliðið.
Gylfi hefur ekki spilað síðan hann var með Everton vorið 2021.
„Ég sagði fyrir viku að ég héldi að Gylfi myndi hætta. Mér hefur eiginlega snúist hugur. Ég held að hann sé að gefa sér smá tíma og taki svo fram skóna aftur,“ sagði Hrafnkell í þættinum.
Brynjar tók til máls.
„Þetta fer illa með menn. Menn eru kannski andlega laskaðir eftir svona, sem getur vel verið að hann sé án þess að ég hafi hugmynd um það. En ef kollurinn er ekki alveg í lagi eftir þetta þá nærðu heldur engum árangri.
En miðað við aldur á hann nokkur góð ár eftir og ég myndi gjarnan vilja sjá hann á knattspyrnuvellinum. Hann var í mínum huga algjör yfirburðamaður í þessu landsliði okkar. Maður veit samt ekki. Þetta var auðvitað gífurlegt áfall.“
Umræðan í heild er í spilaranum.
